വിക്കിപീഡിയ:ധൈര്യശാലിയായി താളുകള്‍ പുതുക്കുക

ഈ താള്‍ വിക്കിപീഡിയയുടെ ഔദ്യോഗിക മാര്‍ഗ്ഗരേഖയായി കണക്കാക്കുന്നു. വിക്കിപീഡിയയുടെ ലേഖകര്‍ ഇതിനെ എല്ലാ ഉപയോക്താക്കളും പിന്തുടരേണ്ടതുണ്ടെന്ന് അംഗീകരിച്ചിരിക്കുന്നു. എന്നിരുന്നാലും ഇവിടുത്തെ പ്രതിപാദ്യങ്ങള്‍ മാറ്റമില്ലാത്തതൊന്നുമല്ല. സാമാന്യബോധത്തിനും സന്ദര്‍ഭത്തിനും ചേര്‍ത്തായിരിക്കണം ഇവ ഉപയോഗിക്കേണ്ടത്. ഈ താള്‍ തിരുത്തുവാന്‍ താങ്കള്‍ ഉദ്ദേശിക്കുന്നുവെങ്കില്‍, ആ പ്രവൃത്തി സര്‍വ്വസമ്മതമാണെന്ന് ഉറപ്പുവരുത്തുക. സംശയം തോന്നിയാല്‍ സംവാദം താളില്‍ രേഖപ്പെടുത്തുക.

[തിരുത്തുക] ധൈര്യശാലിയാകൂ...

വിക്കിപീഡിയ സമൂഹം ഉപയോക്താക്കളെ ധൈര്യമായി ലേഖനങ്ങള്‍ പുതുക്കാന്‍ പ്രോത്സാഹിപ്പിക്കുന്നു. വിക്കികള്‍ വളരെ വേഗം വളരുന്നു, ഉപയോക്താക്കള്‍ പ്രശ്നങ്ങള്‍ പരിഹരിക്കുന്നു, വ്യാകരണം ശരിയാക്കുന്നു, വസ്തുതകള്‍ കൂട്ടിച്ചേര്‍ക്കുന്നു, ഭാഷയുടെ കൃത്യമായ ഉപയോഗം പരിശോധിക്കുന്നു, അങ്ങിനെ അങ്ങിനെ. ഏവരും ധൈര്യശാലിയാകാന്‍ വിക്കിസമൂഹം ആഗ്രഹിക്കുന്നു. വിക്കിപീഡിയ താങ്കളെ വിവരണങ്ങള്‍ കൂട്ടിച്ചേര്‍ക്കാനും, പുനപരിശോധിക്കാനും, ലേഖനങ്ങള്‍ തിരുത്തുവാനും അനുവദിക്കുന്നുവെന്നല്ല, താങ്കള്‍ അപ്രകാരം ചെയ്യണമെന്ന് ആഗ്രഹിക്കുകയാണ് ചെയ്യുന്നത്. തീര്‍ച്ചയായും ദയയുള്ള ഒരാള്‍ക്കേ അതു കഴിയൂ. താങ്കളടക്കമുള്ള അനേകര്‍ക്ക് അതു സാധിക്കുന്നുണ്ട്.

തീര്‍ച്ചയായും താങ്കള്‍ എഴുതുന്നതും ആരെങ്കിലും തിരുത്തിയെഴുതും. അത് വ്യക്തിപരമായി കരുതരുത്. നമ്മുടെയെല്ലാം ഉദ്ദേശം വിക്കിപീഡിയ കൂടുതല്‍ കൂടുതല്‍ മെച്ചപ്പെടുത്തുകയാണല്ലോ.

[തിരുത്തുക] ...പക്ഷേ ഉന്മാദിയാകരുത്

പുതിയ ഉപയോക്താക്കള്‍ വിക്കിപീഡിയയുടെ തുറന്ന മനസ്സ് കണ്ട് അതിലേക്ക് കൂപ്പുകുത്തുകയാണ് പതിവ്. നല്ലകാര്യം, പക്ഷേ ധൈര്യശാലിയാകാനുള്ള ആഹ്വാനം സങ്കീര്‍ണ്ണവും വിവാദപരവും വലിയ പുരാവൃത്തവുമുള്ള താളുകളുടെ ഉള്ളടക്കം മായ്ക്കാനുള്ളതോ വലിയമാറ്റങ്ങള്‍ വരുത്തുവാനോ ഉള്ള കൊമ്പുവിളിയല്ല. താങ്കള്‍ എന്താണ് ചെയ്യുന്നതെന്ന് വ്യക്തമായി മനസ്സിലാക്കുക. അശ്രദ്ധാപൂര്‍വ്വമുള്ള അത്തരം തിരുത്തലുകള്‍ ആ ലേഖനങ്ങള്‍ക്കായി ആത്മാര്‍ത്ഥമായി പ്രവര്‍ത്തിച്ചവരെ വ്രണപ്പെടുത്തിയേക്കാം.

ഇനിയും അത്തരമൊരു തോന്നല്‍ താങ്കള്‍ക്കുണ്ടായാല്‍ താങ്കള്‍ ലേഖനം മനസ്സിരുത്തി വായിക്കുക, ലേഖനത്തിന്റെ സംവാദം താളും വായിക്കുക, ലേഖനത്തിന്റെ പഴയ രൂപം ശ്രദ്ധിക്കുക. എന്നിട്ട് ആവശ്യമായ തീരുമാനമെടുക്കുക. എങ്കിലും വിക്കിപീഡിയ പ്രതീക്ഷിക്കുന്ന പെരുമാറ്റം അപ്രകാരം അല്ല. താങ്കള്‍ താങ്കളുടെ വികാരങ്ങളും വിചാരങ്ങളും താങ്കളെ നിരാശയിലാഴ്ത്തിയ വാക്യങ്ങളുടെ ഉദ്ധരണികള്‍ സഹിതം ലേഖനത്തിന്റെ സംവാദം താളില്‍ കൊടുക്കുക. ആരും എതിര്‍ത്തില്ലെങ്കില്‍ മുന്നോട്ട് ധൈര്യമായി പോവുക. വിക്കിപീഡിയയില്‍ ലേഖനങ്ങള്‍ എഴുതുന്നവര്‍ അതിനായി തങ്ങളുടെ വിശ്രമവേളകളാണ് ഉപയോഗപ്പെടുത്തുന്നത്. അതിനാല്‍ സംവാദം താളിലെ മറുപടിക്കായി കുറഞ്ഞത് ഒരാഴ്ചയെങ്കിലും കാത്തിരിക്കുക.

[തിരുത്തുക] അപവാദങ്ങള്‍

[തിരുത്തുക] സൂചികകളും ഫലകങ്ങളും

ലേഖനങ്ങള്‍ ധൈര്യപൂര്‍വ്വം തിരുത്തുന്നത് ഒന്നാന്തരം കാര്യമാണ്, പക്ഷെ സൂചികകളും ഫലകങ്ങളും തിരുത്തുന്നത് അത്രനല്ല കാര്യമല്ല. അവയുടെ തിരുത്തലുകള്‍ ഒരു താളിലല്ല മറിച്ച് ഒട്ടനവധി താളുകളെ ബാധിക്കും. ഇവയില്‍ എന്തെങ്കിലും മാറ്റങ്ങള്‍ വരുത്തുവാനാഗ്രഹിക്കുന്നുവെങ്കില്‍ അത് അവയുടെ സംവാദം താളില്‍ കൊടുക്കുന്നതാവും നല്ലത്.

[തിരുത്തുക] പൂര്‍വ്വപ്രാപനം(റിവേര്‍ട്ടിങ്)

വിക്കിപീഡിയയില്‍ ധൈര്യശാലിയാവേണ്ടത് മെച്ചപ്പെടുത്തുന്നതിലാവണം, നശീകരണത്തിലാവരുത്. അതുകൊണ്ട് ധൈര്യമായി തിരുത്തുക എന്നതുകൊണ്ട് ധൈര്യമായി ലേഖനങ്ങള്‍ പഴയ അവസ്ഥയിലേക്ക് തിരിച്ചു വെക്കുക എന്നു മനസ്സിലാക്കരുത്. വിവേചനരഹിതമായുള്ള പൂര്‍വ്വപ്രാപനങ്ങള്‍ തിരുത്തല്‍ പോരാട്ടങ്ങള്‍ക്ക് വഴിവെച്ചേക്കാം. എപ്പോള്‍ തിരുത്തല്‍ പോരാട്ടങ്ങള്‍ ആരംഭിക്കുന്നോ അപ്പോള്‍ സംയുക്ത ശ്രമഫലമായ ലേഖനം എന്ന വിക്കിആശയം പ്രവര്‍ത്തിക്കാതാവുന്നു. അതുകൊണ്ട് പൂര്‍വ്വപ്രാപനം ചെയ്യുന്നതിനു മുമ്പ് രണ്ടുവട്ടം ആലോചിക്കുക സംശയം തോന്നിയാല്‍ സംവാദം താള്‍ ഉപയോഗിക്കുക.